Ting eg fatta for seint

Både Sexy Sadie og Beate har “tagga” meg utan at eg torde å seie at eg ikkje forstod kva dei meinte, men no sløkkjer eg lyset og lar det stå til.

1. Eg fattar enda ikkje koss eg skal linke og pinge og tagge – og kva er å meme? 

2. Eg las i min yngste ungdom ei “Månedens bok” i Det Beste om ein amerikanar som var far til12 ungar. Han var ein berømt  rasjonaliseringsekspert, stadig ute på foredrag og reiser. Kvar gong han kom heim, hadde han alltid eit dusin av ei sameleis gåve som ungane skulle få – f.eks. eit dusin kulepennar. Rett som det var fekk ungane også kvar sin sjokola-deis. Bindestreken tipsar om koss eg las ordet. Det var da svært koss denne snille faren deiste til ungane sine! Det gjekk fleire år før eg kom på flytte bindestreken to hakk bakover.

3. På boksen til ei vare stod det at ein måtte “påse” å setje loket på att. Eg forstod det slik at dei hadde feilskrive ordet, og eg lo godt av skrivefeilen. Der skulle nok eigentleg  stå “pose”, – utan at det plaga meg at eg framleis ikkje forstod kva ein skulle pose, men eg var sikker på at eg var eit steg nærare løysinga.

4. Slemme vers og ulovlege songar forstod eg alltid og utan vidare med ein einaste gong.

 5. På mine vaksne dagar ville eg lære meg litt botanikk og la merke til planten som heitte “myrk-legg”. Seinare vart eg ein gong søkkblaut på føtene og forstod at planten kanskje heitte “myr-klegg?

6. Eg har aldri forstått kvifor det ikkje skal vere råd å få FN opp å gå.

(Så slepper eg denne memen vidare på si ferd, og han får altså sjølve linke og pinge og tagge sin veg.)